Изградбата на најдолгиот автопатски тунел во светот е завршена на делницата на автопатот Тиан Шан Шенгли во кинескиот регион Ксинџијанг, а треба да биде отворен оваа година. Тунелот долг 22,13 километри се наоѓа на просечна надморска височина од повеќе од 3.000 метри и минува низ планините Тиан Шан, еден од најголемите планински венци во светот, пишува "Forbes".

Времето на патување до другата страна на планините ќе се скрати од три часа на само 20 минути. Вкупното време на патување на автопатот долг 319,72 километри, кој сега минува низ планините, ќе се намали за повеќе од половина. Автопатот што ги поврзува двата најнаселени града во овој кинески регион, Урумки и Корлу, ќе може да се помине за само три часа наместо досегашните седум.

Три илјади работници на градилиштето

Покрај времето, според Џоу Ронгфенг, директор на Кинеското биро за автопати при Министерството за транспорт, трошоците за транспорт исто така ќе бидат намалени за приближно 15 проценти.

Инженерското чудо, како што некои го нарекоа најдолгиот автопатски тунел во светот, го изградиле повеќе од 3.000 работници. Работите опфатија изградба на две сообраќајни цевки и една сервисна цевка. Сервисната цевка им овозможи на градежните работници да ги поделат главните тунели на помали делови и обезбеди побрзо завршување на работата.

Кинеската државна телевизија "CCTV" објави дека екстремните геолошки предизвици и ризици биле надминати за време на изградбата. Меѓу другото, се работи за сеизмички активно подрачје. Им требаа повеќе од четири години да ги пробијат километарските планински карпи, но работата ја завршија година и пол пред предвиденото.