Фотографијата на тогашната 18-годишна девојка, која била изложена во фотографското студио на нејзиниот зет во Њујорк, го привлече вниманието на агенцијата за наоѓање таленти „Метро-Голдвин-Мајер“. Иако веруваа дека таа не знае да глуми и во првите четири години од нејзината филмска кариера имаше само помали улоги, Гарднер го покажа својот актерски талент со филмот „Убијците“.

Потоа следуваа „Најубавото животно на светот“, „Еден допир на Венера“, „Снеговите на Килиманџаро“, „Босоногата Контеса“ и многу други.

Сепак, таа најмногу се истакна кога соработуваше со големи режисери како Џорџ Кукор, Џон Форд и Џозеф Л. Манкиевич.

„Имам само едно правило во глумата, му верувам на режисерот и му го давам своето срце и душа“, изјави актерката во една прилика.

Турбулентен љубовен живот

Гарднер стана позната и по филмовите и по бурниот љубовен живот. Биографот Ли Сервер во книгата „Ава Гарднер: љубовта не е ништо“ го документирал животот на актерката исполнет со страст, љубов и доцни ноќни скандали, пренесува „Венити фер“.

Почнувајќи од првата љубов, Сервер напиша дека актерот Мики Руни се заљубил во Гарднер на прв поглед.

„Сè застана во мене. Моето срце. Моето дишење. Моето размислување“, тврди ѕвездата.

За неколку месеци, тие се венчале, но нивниот развод бил финализиран само девет месеци по венчавката. Потоа, како што пишува „Пипл“, Гарднер ја барала среќата во бракот со музичарот Арти Шон, но и тие раскинале по околу една година.

„Се венчавме во 45-та година, на 17 октомври. Ме остави една недела по нашата прва годишнина. Копилето ми го скрши срцето“, изјавила актерката еднаш.

Легендарен пар

И тогаш Гарднер влезе во една од најконтроверзните врски со познат музичар и актер, кој во тоа време веќе имал сопруга. Зборуваме, се разбира, за Френк Синатра и неговата сопруга Ненси, од која не брзал да се разведе, иако очигледно имал чувства кон Гарднер.

Легендарната љубовна приказна започнала кога ѕвездите под дејство на алкохол се упатиле кон гратчето Индио, каде Синатра извадил два пиштоли и почнал да ги гаси уличните светла, а Гарнер пукала во прозорец. Поради нивното однесување завршиле во станица, а студиото во кое работеле ги оддалечило од полицијата. Бурната врска на ѕвездите продолжила, а само 72 часа по разводот од Ненси, Синатра се оженил со Гарднер.

Синатра и Гарднер имале бурен живот, најмногу поради консумираното количество мартини, шампањ, вино и виски, што, како што објави „Д Лист“, предизвикало гневни испади и злонамерен темперамент кај пејачот. Исто така, врската им станала комплицирана поради наводните односи на Синатра со мафијата, а гласните расправии и намалената интимност од почетокот на романсата довеле до крајот на бракот во раните 1950-ти.

Актерката подоцна откри дека имала спонтан абортус додека била со Синатра. Забременила за време на снимањето на „Могамбо“ и иако режисерот Џон Форд не побарал од неа да абортира поради нејзината веридба, Гарднер наводно се плашела од мајчинството и знаела дека не е во емотивно здрава состојба за да биде родител. Таа не му кажала дека абортирала на Синатра, што многу го разбеснало.

„Требаше да ја скршам поради тоа што ми го направи мене и на бебето, но премногу ја сакав“, одговори тој.

Сепак, Синатра и Гарднер останале пријатели до нејзината смрт. Синатра ја молел актерката да му даде уште една шанса, но тоа не се случило. Тој дури и ја чувал нејзината фотографија во огледалото во својата соблекувална, а фактот што во доцните 60-ти го принудил својот тим да ја повика актерката и да ѝ каже дека е смртно болен, покажува колку очајно се обидувал да ја врати Гарднер во својот живот.

Актерката патувала 24 часа само за да го најде целосно здрав. Но, тогаш на Гарднер ѝ се слошило, имала мозочен удар поради кој половина од телото ѝ останал парализиран.

Непрежалена љубов

На крајот, таа почина неколку години подоцна од пневмонија, а нејзината смрт го уништи Синатра.

„Ава беше одлична жена и нејзината загуба е многу болна“, изјави пејачот, кој платил за нејзиниот погреб, но не присуствувал на него.

Тина, ќерката на Синатра, призна дека Синатра никогаш не ја преболел смртта на Гарднер.

Сепак, покрај гореспоменатите, Гарднер ги сакаше и актерите Фред Мекмареј, Џорџ С. Скот, а наводно и писателот Ернест Хемингвеј.

Гарднер, додека сè уште беше во брак со Синатра, постојано беше во очите на јавноста, а Хемингвеј наводно ѝ понудил дом во кој би можела да се сокрие. Актерката и писателот поминувале многу време заедно, но нивната врска никогаш не била јасно дефинирана.

Но, Гарднер не била во романтична врска само со уметници, таа имала и неколку средби со Фидел Кастро. Кастро ја однел актерката на обиколка на ВИП апартманот што го делел со неговиот брат Раул и Че Гевара. Тие седеле на балконот со поглед на целиот град, пиејќи коктели, а Кастро ѝ раскажувалч за револуцијата и неговиот сон за иднината на својата нација. Гарднер била импресионирана, но во самото лоби на сместувањето се степала со љубовницата на Кастро, Марита Лоренц, на чија страна и самиот Кастро зазел страна. Иако многумина страдаа за Гарднер, се чини дека нејзината убавина немала толкав ефект врз него.