Светот со нетрпение го очекува вечерашниот настан на Apple наречен „It’s Glowtime“, каде ќе бидат претставени најновите уреди, како и новиот „iOS 18“, кој ја носи новата „Apple“ интелигенција.
Најновата серија на паметни телефони на „Apple“, „iPhone 16“ е нешто што треба да се очекува. Според гласините, „iPhone 16“ ќе доаѓа со нов чип „А-18“ и 8 „GB RAM“ за поддршка на „Apple Intelligence“, вештачката интелигенција што компанијата ја развива за интеграција на своите уреди со најновиот „iOS 18“.
Новите модели носат и поголеми екрани, копче за акција на страната на уредот, кое ќе ви овозможи да стартувате една од апликациите или да иницирате одредена акција на уредот.
Промените во однос на главниот модул на камерата најверојатно ќе бидат кај уредите со две камери, како што беше во серијата „iPhone 11“ или уредите „iPhone X“. Подобрувањето доаѓа и кај самите камери, блендата на камерата е уште поголема за уште подобар квалитет на фотографии направени при слаба осветленост.
За да се спречи прегревање на уредот, батериите добиваат метално куќиште, но во зависност од моделот помал/поголем капацитет во однос на „iPhone 15“.
Покрај најновите серии на „iPhone 16“, на денешниот настан се очекува и претставување на слушалките „Air Pods 4“, „Apple“ часовниците Серија 10, „SE“ и „Ultra“ од 3-та генерација.
„iOS 18“ носи голем број визуелни подобрувања, но и оперативни неопходни за работата на уредот и полесно извршување на задачите. Сепак, најголемата иновација и промена е, како што веќе рековме, „Apple Intelligence“.
