Никола Николиќ (30), државјанин на Србија кој со денови пловел во Атлантскиот Океан кај Канарските острови, во својата исповед го опишал своето трауматично искуство! Откако бил спасен од сигурна смрт по 10 дена поминати во гумен чамец на отворено море, Србинот опиша низ што поминал.
Да потсетиме, Никола кон крајот на јули отишол на риболов со двајца пријатели од островот Тенерифе, но за време на патувањето нешто тргнало наопаку, па тој се нашол сам среде отворено море. По неколкудневни маки, Никола и неговите сопатници успеале да се спасат кога кинески брод дошол по нив
Николиќ за шпанските медиуми изјавил дека отишол на риболов со двајца пријатели од Шпанија, но во еден момент останале без гориво.
„Се чувствував исплашено, со денови бевме сами на море, мислев дека ќе можам да го направам тоа. Брановите го влечеа нашиот мал чамец, а повремено ни приоѓаа ајкули. Во еден момент бевме опкружени со ајкули, кои никогаш не сум ги видел одблиску. Бев убеден дека нема да преживееме“, раскажа Србинот како се чувствувал за време на „бродоломот“.
Иако првите информации биле дека тројцата рибари поминале три дена на отворено море, Николиќ вели дека дури 10 дена пловеле во гумен чамец без гориво. Србинот објаснил дека со своите пријатели Давид Гомез Перез и Хуан Мануел Перез Сантана, планирал три дена да лови риби на отворено море.
„Понесовме храна за тие три дена. Преостанатите седум дена бевме без храна, а последниот ден останавме и без вода и да не дојдеше кинескиот брод по нас, сигурно ќе бевме мртви. Да останевме таму уште само неколку часа, ќе беше крајот“, раскажал тој и опишал дека почнале да викаат за помош кога оддалеку здогледале брод кој им се приближува.
Бродот кој пловел под кинеско знаме „Син Ан Нинг“ ги спасил тројцата рибари од сигурна смрт.
Станува збор за товарен брод кој одел кон Доминиканската Република, па тројцата спасени мажи отпловиле и во таа земја. Бродот пристигнал во пристаништето Хаина во понеделникот и мажите биле предадени на доминиканските власти.
Шпанската амбасада успеала да ги префрли двајцата свои државјани во Шпанија, но Николиќ останува во Доминиканската Република во имиграцискиот центар за странци со неправилни документи за престој.
Николиќ, кој во последните два месеци е во Шпанија и вози камион, вели дека сега се чувствува како затвореник.
„Се надевам дека ќе се вратам во Шпанија што е можно поскоро. Верувам дека наскоро ќе го добијам пасошот, а најмногу сакам да го видам семејството, особено мојата девојка. Доминиканските власти се во контакт со српската амбасада на Куба и очекувам да се забрза процедурата за што поскоро да заминам од овде“, заклучил Србинот кој за чудо преживеа.
