Туристите кои ќе го посетат Копенхаген, ќе бидат наградувани со бесплатна храна и активности доколку собираат отпадоци, патуваат со јавен превоз или се возат со велосипед низ градот, објави туристичкиот одбор на градот, пренесува Би-би-си.
Во пробната шема, која започнува на 15 јули, посетителите можат да бараат бесплатни оброци, кафиња, чаша вино и изнајмување кајак, во замена за нивната еколошки свесна работа.
Како што велат од туристичкиот одбор на Копенхаген, шемата „КопенПеј“ / „CopenPay“ е дизајнирана да го надомести „еколошкиот товар“ на туризмот во градот.
„Кога патувате во странство – ако летате на други места или патувате со автомобил – загадувате. Една од работите што можеме да ги промениме е да ги натераме луѓето да дејствуваат поодржливо на дестинацијата. Планот е само мал чекор кон зелената транзиција“, изјавила шефицата за комуникации на туристичкиот одбор Рике Холм Петерсен.
Проектот е „заснован на доверба“, што значи дека атракциите веројатно нема да бараат доказ дека зелената активност е завршена.
„На некои од атракциите можеби ќе треба да покажете слика од вас како возите велосипед или од вашиот билет за јавен превоз“, додала таа.
Владата не им надоместува на компаниите кои стојат зад атракциите низ градот за учество во шемата – вклучувајќи музеи, барови на покриви и добротворни организации за кајак. Досега се пријавиле 24 организации за овој пилот проект.
Минатата година, Данска забележа над 12 милиони ноќевања низ целата земја, според владините статистики. Петерсен предвидува дека „мал процент“ од посетителите на градот ќе учествуваат во овој проект, кој ќе трае до 11 август.
Оти Џаспер, 25-годишен лондончанец кој во август ќе отпатува на работа во Копенхаген, вели дека е „свесен“ за неговите воздушни милји кога патува.
„Тоа навистина може да се натрупа – мора да размислите дали е од суштинско значење, дали вреди? Од сè што може да се направи, летовите се можеби најлошото нешто за загадувањето“, изјавил Оти.
Говорејќи за шемата, тој вели дека „добро е што прават нешто за климата“, но малку е веројатно дека ќе потроши време собирајќи отпадоци во замена за награда.
Од одборот велат дека ако се процени дека шемата е успешна, таа ќе биде воведена и во текот на остатокот од годината.
„Замислете кога би можеле луѓето да си заминат со ‘позелен’ начин на размислување – ако тоа биде сувенирот што ќе го добијат – тоа би било неверојатно“, вели г-ѓа Петерсен.
