Триесет подружници се собраа пред Јавното претпријатие Национални шуми, со цел да го изразат незадоволството оти втор месец немаат добиено плата, ниту теренски додаток.
Претседателот на Синдикатот за градежништво, индустрија и проектирање (СГИП) Иван Пешевски, од протестот рече дека вработените се на своите работни места и не ги извршуваат задачите, оти се гневни и на менаџментот и директорот и на нивните раководители и сите претставници од власта кои земаат 80 отсто зголемени плати, а тие не дочекале да добијат втор месец плата.
„Апелираме да не си поигруваат со судбината на овие 1.800 вработени, бидејќи ако можеа да вработуваат луѓе пред избори и да ги лажат, тогаш треба и да обезбедат плати“, рече Пешевски, појаснувајќи дека 355 работници биле примени на работа пред два месеци. Тој е дециден дека претпријатието нема потреба од сезонски работници, туку луѓето коишто веќе се таму треба да имаат 12 месеци плата и здравствено осигурување.
Претседателот на синдикатот им порача на политичарите кога одат по градовите по митинзи да ги прашуваат луѓето за нивните проблеми, оти работникот веќе е згорчен од политика и оди на работа за плата и додатоци.
„Срамота е во 21 век да се молиме за плата“, рече Пешевски.
Како што додаде, во Национални шуми нема крадци, туку крадците се по дирекциите и во фотелјите. Крадците, вели Пешевски, не се ни сеча, ни дотур, ни сите оние шумари коишто земаат мизерни плати, изложени на надворешни влијанија и со висок процент на ризик.
Најави дека планираат да ги радикализираат протестите и пред Владата во следните денови, и на 1 мај – како меѓународен ден на трудот.
„Ќе бидеме се побројни и погласни особено вработените во јавниот сектор. Врие и во паркови и зеленило, комунална, водовод, водостопанство, македонски пошти, врие и кај културните работници. Сите се со мизерни плати“, рече тој.
Прашан од новинарите за ставот на менаџментот, Пешевски од протестот изјави дека од таму секогаш велат оти зимскиот период е тежок.
„Како може да трошат милиони на возила, а да не обезбедат плата за ваботените. Работниците не се должни да чекаат 2 или 3 месеци за плата. Не веруваме во лаги и ќе протестираме ако треба секој ден“, додаде.
Појасни дека платата на шумарскиот инжинер не изнесува повеќе од 25 до 26.000 основни примања, без додатоци.
