Северна Кореја денеска објавила фотографии кои, како што тврди, покажуваат тестирање на нејзиниот најголем проектил во последните неколку години.
Тестирањето на балистичките ракети со среден домет "Хвасонг-12" е реализирано во текот на вчерашниот ден, што било прв пат од 2017-та година Пјонгјанг да тестира ракета која има капацитет да носи нуклеарна глава, пренесува агенцијата "Reuters", додавајќи дека ова била седма проба на севернокорејското вооружување од почетокот на јануари.
Севернокорејската државна новинска агенција "KCNA" денеска соопштила дека оваа ракета може да дојде до американската територија Гуам во западниот Пацифик, пренесува "Guardian".
"KCNA" објавила два сета фотографии од неделниот тест, од кои на едната се гледа ракета која се крева од својот лансер во близина на границата со Северна Кореја со Кина, а друга прикажува фотографија од вселената, а двете фотографии се направени со камера инсталирана на боевата глава на ракетата.
Во извештајот на "KCNA" се наведува дека проектилот е лансиран по нагорна траекторија имајќи ја во предвид "безбедноста на соседните земји".
Според проценките на јужнокорејската и јапонската војска, проектилот прелетал околу 800 километри и достигнал максимална брзина од 2.0000 километри пред да слета во морето меѓу Корејскиот полуостров и Јапонија.
Севернокорејскиот лидер Ким Јонг Ун бил присутен на претходните лансирања, но не присуствувал на последниот тест.
По најновото тестирање, САД изразиле загриженост, наведувајќи дека се почестите ракетни тестови на Пјонгјанг би можеле да бидат вовед во обновување на тестирањето на нуклеарното оружје.
