Американската пејачка и актерка Деми Ловато за прв пат е видена во јавноста откако речиси ќе умреше од предозираност кон крајот на јули. Како што наведуваат американските медиуми, пејачката изгледала среќно и опуштено.
Таа била забележана како разговара со пријателка со која се нашла на кафе во паузата од рехабилитација.
Деми изгледала среќно и опуштено додека разговарала со пријателката која го шетала нејзиното куче. 26-годишната Ловато кон крајот на јули оваа година заврши во болница поради предозираност. Минатата недела, нејзината мајка го дала првото интервју во кое изјавила дека Деми е добро.
"Се уште ми е тешко да зборувам за тоа. Само кога ќе се сетам на тој ден и што се случило, почнувам да се тресам", изјавила Дајана де ла Гарза.
Деми Ловато во повеќе наврати во јавноста зборувала за својата зависност од дрога и алкохол, како и за психичките проблеми. Таа е лечена поради пореметување во исхраната, а изјавила и дека пати од биполарно пореметување.
Во документарното видео на Јутјуб од 2017 година со наслов "Simply Complicated", пејачката зборувала за годините земање дрога, пореметувањата во исхраната и за алкохолот. Признала и дека за прв пат земала кокаин на 17 години.
