СДСМ предреферендумски ги манипулира граѓаните исто како што ги излажа пред изборите, реагираат од опозициската ВМРО-ДПМНЕ преку соопштение до медиумите.
Од партијата велат дека билбордите низ државата кои ветуваат бесплатно здравство кога ќе влеземе во ЕУ се лага.
„Во ЕУ здравството не е бесплатно, ЕУ не е комунистичка творевина, туку економски сојуз на држави каде се си има своја цена. СДСМ лаже и ја злоупотребува ЕУ, го погани нејзиното име за да ја оправда срамната капитулација која ја потпиша. Владата на Заев ја понижи Република Македонија и ги урна преговарачките позиции кои беа градени со години од сите влади од независноста до денес. Погазено е и меѓународното право и Хашката пресуда во корист на Република Македонија“, се наведува во соопштението на ВМРО-ДПМНЕ.
ВМРО-ДПМНЕ, се додава во партиското соопштение е за влез во ЕУ и НАТО, но не и за договорот со Грција, кој, како што велат не можат да го прифатат.
„Овој договор предизвикува само обврски и прави штета на Република Македонија и затоа ВМРО-ДПМНЕ неможе да го прифати. Прашањето за промена на името не е прашање кое може да го реши било кој политичар, тоа е прашање за кое може да одлучи единствено народот, токму затоа на слободната волја на народот е како тој ќе се постави во однос на ова прашање“, додаваат од партијата во соопштението.
