Железничката станица во Скопје, долго запуштена и запоставена, конечно започна со сериозно чистење и уредување, со што се враќа нејзиниот репрезентативен изглед. Директорот на „Македонски железници – инфраструктура“ ја најави отстранувањето на нелегалните реклами и хигиенска санација.
Железничката станица во Скопје, која со години беше оставена на работ на функционалноста и хигиената, конечно се чисти и уредува. Директорот на Јавното претпријатие „Македонски железници – инфраструктура“, Синиша Ивановски, информираше дека е започната акција за враќање на репрезентативниот изглед на овој објект.
Според Ивановски, децениската институционална и општествена негрижа ја претвориле станицата во нерепрезентативен објект „накитен“ со билборди, нелегални постери, графити и несоодветни содржини и недоволна хигиена.
Како прв чекор од најавеното чистење Ивановски вели дека веќе се отстранети речиси сите билборди, светлосни реклами и со години напластуваните информативни постери.
Ивановски посочува дека еден од комерцијалните субјекти одбил сам да ја отстрани својата реклама.
„Остана уште една светлосна реклама на ‘Хамза Донер’ кои одбиваат да ја извадат. Доколку не ја отстранат во рок од седум дена, договорот за закуп ќе им биде раскинат“, вели директорот на ЈП „Македонски железници – инфраструктура“.
