Енцо збесна по грешката на голманот Јоргенсен, менаџерот на Челси ја брани одлуката за „копирањето“ на Тудор

Менаџерот Лиам Росениор во стилот на колегата Игор Тудор реши да направи промена на голманската позиција за осминафиналето во Лигата на шампионите, а замената за Роберт Санчез на крајот имаше директно, негативно влијание врз резултатот за Челси.

Јоргенсен им подари топка на домаќините, кои реализираа атрактивно преку Витиња, а капитенот Енцо Фернандез не ја криеше лутината и уште по голот јасно покажа колку е лут поради грешката на голманот. Гестикулациите и фрлањето на топката кон Јоргенсен се доказ колку беше лут Аргентинецот, а неговиот менаџер сепак ја бранел одлуката да му даде шанса на вториот голман.

– Санчез и Јоргенсен имаат различни квалитети, а Филип има неверојатен талент и една од причините што ја победивме Астон Вила беше начинот на кој игравме со топка од задната линија. Но, фудбалерите понекогаш прават грешки, Јоргенсен не е прв, ниту последен на кого му се случило такво нешто, а тој им се извини на соиграчите во соблекувалната, – рекол Росениор.