Проектот, наречен „Бугати Резиденс“, се гради во соработка со инвеститорот „Бингати Пропертис“, а интересот на пазарот веќе ги надмина сите очекувања. Дека станува збор за сектор наменет исклучиво за светската елита, потврдува и фактот дека најевтините станови во оваа 43-катница чинат околу 5,2 милиони долари, додека најпрестижните пентхауси се веќе резервирани за глобални ѕвезди.

Некои од ѕвездите се Андреа Бочели, како и бразилската фудбалска ѕвезда Нејмар Џуниор, кој наводно издвоил дури 54 милиони долари за стан кој нуди посебна погодност, приватен лифт кој му овозможува да го паркира автомобилот директно во дневната соба.

Брендираните станови обично се од 30 до 40 проценти поскапи од луксузните домови кои немаат добропознат потпис. Многу од новите брендирани проекти вклучуваат приватни клубови за членови, велнес објекти и ексклузивни услуги - од автомобили со шофер и пристап до јахти до приватен авион.

Експлозивен раст на пазарот на брендирани резиденции

Овој феномен не е изолиран случај, туку дел од глобалниот тренд на „брендирани резиденции“ кој доживеа невиден раст во последните две години. Според извештајот на компанијата „Најт Френк“, додека во 2011 година имало само 169 вакви проекти низ целиот свет, сега има повеќе од 600 активни, а се предвидува дека до крајот на деценијата тој број ќе надмине 1.000.

Додека хотелските синџири како „Рик-Карлтон“ порано доминираа во ваквите недвижности, денес на пазарот влегуваат производители на автомобили како „Порше“ и „Астон Мартин“, производителите на швајцарски часовници „Џејкоб и Ко“, како и италијанските модни гиганти „Фенди“ и „Мисони“.

Соединетите Американски Држави моментално се водечки по бројот на вакви згради, со епицентри во Мајами и Њујорк, но Блискиот Исток доживува најбрза експанзија. Дубаи стана светски лидер по бројот на проекти во развој, што експертите го припишуваат на постојаниот прилив на екстремно богати поединци кои се преселуваат во овој град поради ниските даноци и високото ниво на безбедност.

Цените на недвижностите во Дубаи, и покрај вртоглавите износи, сепак се поповолни отколку во Лондон или Њујорк, што дополнително ги привлекува инвеститорите кои бараат ексклузивност со потпис на омилен бренд.

Психологијата на престижот и прашањето за добриот вкус

Експертите за психологија на потрошувачите истакнуваат дека овие станови претставуваат нов вид „социјална валута“. Ѓана Екхарт, професорка по маркетинг на Кингс колеџот во Лондон, за Би-Би-Си објаснува дека ултра богатите потрошувачи повеќе не бараат само покрив над главата, туку начин да го комуницираат своето место во општествената хиерархија. Брендираните станови се доказ за нивниот статус, исто како ретка дизајнерска чанта или уникатен накит, бидејќи им даваат чувство дека поседуваат нешто што е недостапно за остатокот од светот.

Покрај престижното име на фасадата, овие згради нудат и футуристички објекти што досега не се видени во станбени згради. Ново ниво на брендирани недвижности се продава и околу заеднички страсти како што се гастрономијата, велнесот, па дури и науката за долговечност.

Екхарт, која е специјализирана за однесување на потрошувачите, брендирање и потрошувачка култура, додава дека луксузните брендови комуницираат „лично место во општествената хиерархија“.

Сепак, бизнис психологот Стјуарт Даф од британската фирма Пирн Кандола предупредува дека многу луѓе може да ја сметаат идејата за брендирани станови за неприфатлива, особено ако името на брендот е премногу истакнато.

„Присуството на бренд насекаде во станбена зграда може да ја намали перцепцијата за реткост и уникатност и да доведе до чувство на фалење. Во најлош случај, може да се перцепира како вулгарно и кич“.