Двајцата ќе го збогатат музичкото уживање и ќе го надополнат концептот наречен „Кадифено“ со префинети звуци кои претставуваат микс на македонска и турска традиционална музика во комбинација со модерниот звук на денешницата. Во заедничкото интервју кое може да го прочитате подолу, дознајте зошто Џенк и Ахмет го нарекуваат овој концерт „музичко доживување кое не смее да се пропушти“.

Каде се запознавте и како започна соработката со Зарина Првасевда?

Џенк Ердоган: Првпат се запознавме на музички камп - семинар во Кападокија. Неколку дена подоцна посакавме да свириме некои песни заедно и веднаш почнавме да звучиме совршено заедно. Засвиривме традиционална македонска песна и почувствувавме дека мојата гитара без прагови се вклопува многу добро со нејзиниот силен глас. Потоа таа ме покани да учествувам во овој возбудлив проект.

Ахмет Алан: Зарина и јас првпат се запознавме за време на програмата „Music Village“. Во текот на програмата работевме со музичари од различни култури, а во моментот кога го слушнав нејзиниот глас и нејзиниот музички пристап, нешто веднаш ми се допадна. Таа почувствува иста врска со мојот ритмички свет.

Штом ја слушнавме музиката еден на друг, интеракцијата беше многу природна — речиси како да свириме заедно со години. Пред да заврши програмата, веќе почнавме да експериментираме и да создаваме идеи заедно. Таа органска енергија природно прерасна во соработка која не доведе до овој проект денес.

Дали гледате сличности помеѓу стиловите на македонската и турската традиционална музика? И зошто мислите дека овој вид етно звук се враќа на големата сцена, особено во Европа?

Џенк Ердоган: Како што знаете, Македонија останала под Османлиите речиси 500 години, и во тој период двете заедници биле во постојана интеракција во секојдневниот живот, јазикот и традициите. Делиме исти зборови, иста храна, па зошто да не ја споделиме и нашата музика? Од друга страна, денеска етно музиката ги вклучува сите музички стилови од џез до традиционална музика. Мојата гитара без прагови може да биде точка на поврзување на нашите култури, а гласот на Зарина ќе биде нашето светло на сцената.

Ахмет Алан: Апсолутно. Македонската и турската традиционална музика имаат длабоки сличности — асиметрични ритми, силни мелодиски линии и емотивна интензитет која произлегува од векови културна меморија. За мене, овие две традиции се различни изрази на истата географија и споделени историски корени.

Што се однесува до тоа зошто етно звукот се враќа на големата сцена, особено во Европа: луѓето бараат автентичност. Тие сакаат музика која има приказна, културен идентитет и човечка врска. Кога традиционалните елементи се среќаваат со современа интерпретација, се создава нешто и свежо и познато. Публиката го чувствува недостатокот на таа искреност, и мислам дека тоа е причината зошто овие звуци повторно се најдоа на големите фестивали и концертни сали.

Концертот во Филхармонијата е закажан за 20 декември, и изгледа дека дури и сега сте целосно подготвени да понудите незаборавно музичко искуство на македонската публика. Дали ова ќе биде ваш прв настап во Македонија? Што би им рекле на оние што сè уште размислуваат дали да купат билет за концертот?

Џенк Ердоган: Ова ќе биде мојата прва посета на Македонија и многу сум возбуден за овој концерт. Јас сум туринг артист кој патува низ целиот свет, но секогаш сум го сакал познатиот чувствителен амбиент на Балканот. Сигурен сум дека песните кои ќе ги свириме таа вечер ќе ги стоплат срцата на нашата публика. Сè што можам да кажам е дека вреди да ја споделите оваа вечер со нас. Со нетрпение очекувам да се запознаеме.

Ахмет Алан: Да, ова ќе биде мојот прв настап во Македонија, и тоа ја прави оваа средба уште повозбудлива за мене. Споделувањето на музичката врска која Зарина и јас ја изградивме - и тоа за првпат во нејзината сопствена земја и пред нејзината публика - навистина посебно. Друг елемент кој го истакнува овој концерт е присуството на високо ценетиот музичар Џенк Ердоган. Неговата музичка интуиција, микротонски пристап и уникатен изразен стил внесуваат длабока и посебна боја во спојот на македонските и турските звучни традиции во овој проект. Присуството на сцената со нас додава значајна димензија на целиот настап. За оние што сè уште размислуваат дали да купат билет, би рекол следното: концертот не е само настап; тоа е точка на средба на три музички светови кои се обединети да раскажат една единствена приказна. Подготвивме програма која ги спојува традиционалните влијанија со модерен звук, носејќи силна емотивна длабочина. Навистина верувам дека енергијата и музичката хармонија кои ќе ги споделиме на сцената ќе создадат незаборавно искуство за секој присутен во салата.