Илјадници депонии низ Велика Британија и Европа се наоѓаат во области склони кон поплави, што го зголемува ризикот од испуштање токсичен отпад во водата за пиење и екосистемите, покажа првото мапирање на овие локации на целиот континент.
Истражувањето е спроведено од Гардијан и „Watershed Investigations“ и „Investigate Europe“.
Резултатите покажуваат дека од 61.000 мапирани депонии во Европа, околу 28 проценти се наоѓаат во области склони кон поплави.
Експертите предупредуваат дека вистинскиот број на локации кои се изложени на ризик може да достигне до 140.000.
„Со сè почестите и интензивни поплави поради климатските промени, постои поголем ризик од испуштање хемикалии и токсични метали во животната средина“, рече Патрик Бирн од Универзитетот Ливерпул Џон Мурс.
Истражувачите пронајдоа зголемени нивоа на „вечни хемикалии“ PFAS и полихлорирани бифенили (PCB) на некои локации.
Во Чешир, хемикалиите PFAS беа откриени 20 пати над стандардите за вода за пиење, додека во Грција, нивоата на PFA беа надминати повеќе пати, а живата и кадмиумот се исцедија во реката Недонтас, според истражувачите.
Повеќе од половина од мапираните депонии се наоѓаат во зони каде што подземните води не ги исполнуваат хемиските стандарди, што укажува дека историските депонии веќе можат да придонесат за контаминација.
Европските експерти предупредуваат дека фрагментираните и нецелосни податоци за локациите на депониите го отежнуваат проценувањето на ризикот и управувањето со него.
Исто така, нелегалното фрлање отпад продолжува да биде растечки проблем во неколку европски земји.
Експертите велат дека долгорочното решение лежи во подобро мапирање на депониите, управување со хемикалии и инвестиции во рециклирање и намалување на отпадот.
