Бизнисот на иновативната пензионерка од Словенија цвета – таа добро заработува од југоносталгијата, пишува „Бука“.
Љубљанчанката Шпела ја споила својата страст кон старите предмети со маркетинг вештините и така го создала брендот „Made in Yugoslavia“, со онлајн продавница преку која продава познати предмети од времето на СФРЈ, кои го одбележале детството на многу граѓани.
Тука се телефоните на „Искра“ во разни бои, портокаловите лустери од „Мебло“ и познатиот гоблен „Бамби“, како и предмети што речиси секое домаќинство ги имало.
Еден од најбараните артикли се прочуените бели шолји со сина линија, кои се користеле во тогашните хотели, мотели, кафулиња, но и во вагоните на Југословенските железници, каде што патниците ноќевале или ручале.
Цените на винтиџ симболите од поранешната држава не се баш симболични. Сет стаклени чаши чини повеќе од 100 евра, додека познатиот гоблен Бамби чини дури 60 евра. Шпела ги предлага овие предмети и како уникатен божиќен подарок.
Им препорачува на купувачите под елката да стават убаво завиткана шолја за кафе со чинивче, а кој сака, може да добие и џезве. Еден од подароците може да биде и дизајниран календар за 2025 година. Шпела се покажала како паметна претприемачка, бидејќи југоносталгијата ја претворила во профитабилен бизнис.
На нејзината интернет-страница може да се види дека постерот со Тито и Јованка Броз чини 29,90 евра, винтиџ лустер од производителот „Сијај Храстник“, произведен во седумдесеттите години, чини дури 277 евра. Шолја со познатата кравичка чини 49 евра, додека сет од две шолји на „Југокерамика“ чини 18 евра. Телефонот „ATA 32“ на „Искра“ се продава по цена од 65 евра.
