Украинската инфлуенсерка „yep4andy“ преку своите социјални мрежи секојдневно споделува реален приказ на моменталната состојба во Украина.
На својот „ТикТок“ профил, „Инстаграм“ и „Јутјуб“, покрај лајфстајл темите, прикажува и како изгледа нејзиниот живот во екот на руската инвазија врз Украина.
Во едно од видеата ја прикажува храната што ја добива во засолниште, додека во други видеа покажува што ѝ подготвува нејзината баба, особено во моменти кога во Украина нема струја, но и во ситуации кога постои можност за нов ракетен напад.
Секогаш во состојба на готовност за она што следи, но и во неизвесност, таа прикажува како Украинците се справуваат со моменталната ситуација. Нејзините видеа наидоа на бројни позитивни реакции, па така на „ТикТок“, каде речиси секојдневно објавува, има повеќе од еден и пол милион следбеници.
Потсетуваме, ракетните напади врз Украина стануваат сè почести, а во моментов е актуелно разгледувањето на потенцијални преговори за постигнување примирје, кои повеќе ги туркаат САД.
Сепак, многу Украинци се против овој договор, бидејќи сметаат дека е изработен врз основа на руски нацрт. И оваа инфлуенсерка на своите социјални мрежи истакнуваше дека со овој договор се обидуваат да се амнестираат руските воени злосторства.
