Најнова технологија која користи револуционерен роботски систем ќе им помогне на археолозите во реставрацијата на античкиот локалитет Помпеја, затрупан со лава по ерупцијата на Везув во 79 година од нашата ера, пренесе Ројтерс.
Технологијата развиена во рамки на проектот наречен „RePAIR“ финансиран од Европската унија користи програма за препознавање на слики во Помпеја со помош на вештачка интелигенција (AI), во комбинација со ултра-прецизни роботски раце со цел да се забрза процесот на реставрација на фрески, кој инаку е бавен и исклучително напорен, пренесе агенцијата. Проектот бил лансиран во 2021 година, во координација со универзитетот „Ca’Foscari“ од Венеција, а вчера бил претставен на локалитетот Помпеја.
Во рамки на проектот, меѓународни тимови од истражувачи го користеле овој археолошки локалитет како полигон за тестирање.
Според директорот на локалитетот, Габриел Зухтригел, експерименталниот проект е започнат среде конкретната потреба повторно да се состават и реставрираат фрагментите од фрески оштетени во Втората светска војна.
Истражувачите веруваат дека новата технологија би можела да помогне во реставрацијата на артефакти ширум светот.
Роботот користи два пара флексибилни раце опремени со сензори кои можат да идентификуваат, земаат и составуваат фрагменти, а притоа да не ја оштетат нивната чувствителна површина.
Истражувачите ја споредиле задачата за реставрација на фреските со решавање на џиновски сложувалки, со дополнителна тешкотија за пронаоѓање на фрагменти што недостасуваат.
Античкиот град Помпеја, во близина на Неапол како и неговата околина биле затрупани од лава при експлозија на Везув во 79 година од нашата ера.
Денес
