Овој магичен простор, основан од Стафан Гетестам, Фредрик Урштрем и Педер Валинберг, целосно ќе ве освои и ќе ве врати во детството, во свет полн со фантазија, соништа и безгрижност, каде што возрасните навистина имаат што да научат од децата.

Секoja куќичка е посветена на по една шведска детска авторка

Јунибакен, петтата најпосетувана атракција во Стокхолм, официјално е отворен во 1996 година од кралското семејство. Тој е посветен на шведската детска литература, со особен фокус на легендарната Астрид Линдгрен, авторката на „Пипи долгиот чорап“, чиј бронзен кип се наоѓа пред зградата.

Интериерот го уредила шведската уметница Марит Торнквист, која ги илустрирала поновите изданија на Линдгрен. Ормарињата во фоајето се обликувани како огромни книшки со класици како „Островот со богатство“ и „Книга за џунглата“.

Една од главните атракции е „Плоштадот на приказните“, секоја куќичка таму е посветена на одредена шведска детска авторка и води до железничката станица Вимерби.

Возењето со магичниот тематски воз завршува кај познатата Вила Вилекула

На станицата Вимерби може да се види уникатна меморабилија посветена на „мајката“ на Пипи – меѓу кои и писмо од поранешниот советски претседател Михаил Горбачов. Оттаму тргнува и познатиот магичен воз низ светот на Астрид Линдгрен – фантастично патување низ сценографии инспирирани од нејзините дела: „Браќата со лавовско срце“, „Роња, ќерката на разбојникот“, „Карлсон од покривот“. Возењето завршува кај прекрасно реконструираната Вила Вилекула, домот на Пипи.

Змајот Катла бил толку страшен што морале да го променат

Во минатото, сцената со змејот Катла од „Браќата со лавовско срце“ била многу пореалистична и многу деца ги плашела. Некогаш посетителите минувале токму пред него додека се движел и „ригал оган“. Но во 2006 година сценографијата била изменета – денес Катла е статичен и се гледа од безбедна далечина.

Јунибакен е културна куќа за деца и возрасни – со театар, ресторан и најголемата детска книжарница во Шведска Денес комплексот има театар во кој се играат над 1500 претстави годишно, ресторан, галериски простор и најголема детска книжарница во земјата. Го посетуваат околу 275.000 луѓе годишно. Основачите сакале да создадат жив културен центар, а не класична, стерилна институција, туку место полно живот, боја и возбуда.

Место каде не се бега од проблемите, туку се зборува за сè што е важно во животот

Јунибакен инспирира, буди емоции и ја поттикнува креативноста и љубовта кон читањето. Во неговиот центар се приказните, музиката, песните, театарот и играта – во духот на Астрид Линдгрен.

Тука децата и возрасните ги делат истите доживувања – подлабоки од краткорочна забава и носат трајни спомени. Ова е место каде што не се бега од важните теми, туку отворено се зборува за нив, токму како што тоа го правела Линдгрен во нејзините дела.

Знаевте ли дека првото издавачко куќиште ја одбило „Пипи долгиот чорап“?

Астрид Линдгрен, родена на фармата Нес во Вимерби во 1907 година, дебитирала дури во својата 37-ма година и тоа благодарение на својата ќерка Карин.

Кога Карин имала седум години и лежела болна со воспаление на белите дробови, ја замолила мајка си: „Раскажи ми приказна за Пипи долгиот чорап“. Така започнала магијата. Подоцна, кога Астрид го испратила ракописот до издавач, прво била одбиена – Пипи била „премногу неконвенционална“. Денес, таа одбиена приказна е светски класик.

Линдгрен освоила многубројни награди не само за литературата, туку и за својот активизам, особено за правата и благосостојбата на животните.

Посетата на прекрасниот Јунибакен е совршена прилика да го разбудите детето во себе

Приказните на Линдгрен ни покажуваат дека радоста не може да постои без тага. Тие ни ги обележаа детствата, а често нè следат и во возрасниот период затоа што се занимаваат со безвременските човечки борби со кои сите се соочуваме — прашања за животот и смртта, за пријателството и осаменоста, за доброто и злото…

Посетата на Јунибакен е совршена прилика да го разбудите детето во себе и да се вратите дома со голема насмевка на лицето!