Кралот може да си дозволи што и да му падне на памет, колку и тоа да звучи бизарно. Овој "Rolls-Royce" е одличен пример.
Бил купен од мароканскиот крал Хасан Втори. Но, овој "Rolls-Royce Camargue" од 1977-ма не му бил доволен, па го пратил на модификација. Работата ја завршил "Sbarro", што значи дека станувало збор за екстензивни модификации.
Имено, мароканскиот крал сакал да се занимава со лов, а посебно со соколарство. За да може да оди во лов му бил потребен соодветен автомобил, а за тоа се погрижил швајцарскиот каросерист кој од оваа лимузина направил робустен теренец. Прво ја подигнал суспензијата и поставил теренски гуми, а потоа го отстранил кровот на возилото.
Зад задните седишта е вграден хромиран носач кој служи за сместување на соколи. Ауспухот сега е од страна, а 6,75-литарскиот мотор и натаму развива 212 коњски сили.
Стандардниот "Camargue" чинел 30.000 фунти, што денеска би било околу 200.000 фунти. Целосниот опис можете да ги видите на страниците на германскиот огласник "Autoscout24.de".
