Бен Крамп, адвокат на семејството на Џорџ Флојд верува дека постојат доволно докази кои потврдуваат дека полицаецот Дерек Шовин, кој е обвинет за убиство на Афроамериканецот, делувал со предумисла.
Шовин е обвинет за убиство од трет степен, но адвокатот Крамп смета дека сепак станува збор за убиство од прв степен, пренесуваат американските медиуми.
„Не ни е јасно како тоа не е оквалификувано како убиство од прв степен“, изјави Крамп за "CBS".
Тој истакна дека полицаецот речиси девет минути го држел коленото притиснато врз вратот на Џорџ Флојд чија смрт предизвика масовни и насилни протести ширум Соединетите Американски Држави.
„Мислиме дека имал намера“, изјави Крамп.
Џорџ Флојд почина за време на апсењето од страна на полицијата кога Шовин, како што е наведено во кривичнта пријава, 8 минути и 46 секунди го држел коленото притиснато врз неговиот врат.
Во кривичната пријава се додава дека патологот заклучил дека за смртта придонела и комбинацијата на можните опојни средства во неговото тело и здравствените тегоби кои што ги имал.
Меѓутоа, двајцата доктори кои извршија независна обдукција на телото на Џорџ Флојд соопштија денес дека тој починал од задушување и дека станува збор за убиство.
