Руската ракета „Сојуз-2“ утринава беше лансирана од космодромот „Биконур“ со цел да биде извршено тестирање на нов погон и товарно летало.
Покрај тоа, ракетата понесе и мал хуманоиден робот наречен Федор, чија што дестинација е Меѓународната вселенска станица.
Станува збор за тестирање на носечка капсула која досега учествуваше само во доставување на сателити во орбитата. Таа ќе го достави роботот Федор, односно “Skybot F-850” кој во текот на патувањето ќе биде сместен во пилотското седиште како човек.
Федор на Меѓународната вселенска станица носи посебно подготвени податоци за екипажот, а откако ќе пристигне на станицата, на Земјата ќе испрати информации поврзани со безбедноста на летот на „Сојуз-2“.
Покрај тоа, Федор во текот на 17-дневната мисија ќе изврши пет-шест комплексни задачи кои што засега се тајна. Неговото пристигнување на Меѓународната вселенска станица е закажано за недела.
