Хонг Конг е толку скап што архитектите ќе започнат со градење на домови од десет метри квадратни

Во изминатите седум години Хонг Конг ја задржа титулата за најскап град на светот за купување на куќи, пишува Бизнис Инсајдер. 

Џејмс Ло, архитект од Хонг Конг смета дека неговите микро-домови би можеле да помогнат во ублажување на станбената криза во градот. Неговите мали куќи се сè само не типични, имено куќарките се направени од бетонски водоводни цевки, а нивниот ентериер е опремен со сите погодности на модерниот дом.

Компанијата на Ло, Џејмс Ло Сајбертекчр произведе куќа во вид на цевка во која во десет квадрати може да биде сместен кауч кој се расклопува во кревет, полици, фрижидер, микровална печка и тоалет со туш.

Иако дизајнот на куќата моментално е само прототип, Ло наведува дека во иднина планира да ги продава, а неговиот тим бара дозвола за нивна изградба.

Секоја куќа чини 15.000 долари. Тоа не е ефтино, но е многу поефтино од просечната цена за нов дом во Хонг Конг. Имено, стан од 60 метри квадратни во овој град чини неверојатни 1,8 милиони долари.

"Во Хонг Конг многу луѓе живеат во тешки услови поради исклучително високите цени, трошоци за живеење и неадекватно јавно сместување. А, овие куќарки се поефтина алтернатива", рекол Ло.